الأربعاء، 20 مارس 2013

اشعار عراقـــيه 2013



شلت اسمك شعار بثورة الاحساس
ورفعتـك بيـن كل الناس رايــه_
احتمال الدنيه تمطر يوم بالصيف_
احتمال البحـر يخلص يوم مايــه_
بس ماكو احتمال بيــوم انسـاك_
واگــص السانــه ليطلــع دعـايـه


*********************************

كل ظنك نسيتك وانتهه الموضوع 
وكلبي بكل دقيقه عليك يسألني 
يامالك شعوري وماخذ التفكير 
وعلى الصفنه الطويله اجفاك علمني 
احب ذيج الايام العشت بيه وياك 
واحب كل لحظه كلبك بيهه يذكرني


**********************************


حرت شكتب بخط القلم شملي 
واريد وياك ما نفترك شملي 
يهل رايح البيت الولف شم لي 
اخدوده ومن تعود انفخ عليه 



*********************************


اذا وياك اسولف صدك ارتاح 
لان كلبي بكلامك تسكت اجروحه
اريد اوياك احجي وصرت انت الروح
ومجبور البشر يحجي وي روحه 



********************************

ياعشرة عمر ماتنسي بلحظات 
ويازاد وملح ساكن على الساني 
ياضحكه وسوالف والصداقه وسرار 
يااجمل صديق بين صحباني 
ياسهر اليالي وكعدت الاحباب 
يااجمل لحن كاعد على اغصاني
عهد من قلبي اخذته موافق ومسؤول 
ما انساك اذا فد يوم تنساني 


*********************************

يااول جرح عاشرني من دنياي
يالطبعك ملح ضميته بجروحي 
اعوفنك جذب ليش انت هم تنعاف 
انت الروح صدك يابعد روحي 


*********************************


شلونك حبيبي وشبيك حزنان
وليش بعيونك تلمع الدمعه؟؟
وليش ساكت وأحسك بالقهر غركان
وثوبك حبيبي بدموعك منكعه؟؟
أحجيلي حبيبي حتى ابجي وياك
لازم اجيك اليوم وهمك أطلعه
فرغ همومك عليه وكلي ألك أذان
وصدكني ترتاح من همك اسمعه
أني ما أحبك اذا ما أحس بيك
و أنت لو سم همك واجب أجرعه



*******************************


شيفيد الاسف من نعترف بيه
ونمشي اعله الغلط ما نكدر نصلحه
مثل ناطور ليل بظلمة العشاك
ينطر للصباح وما يهل صبحه
شكثر مرت مواقف بيهة افراح
مظلوم البخت ما دامت الفرحة
السبب بينه البشر علمتنه الايام
نضحك بالوجوه بروح سمحه
والناس المصيبة بوجه دجال
تتظاهر مراية وبالنفس ملحة
علينا العتب عمي نصدك بساع
وتهمنه المظاهر ابد ما نصحه
نتيجة الغدر صارت تهدم امال
ما تلكه الصديق الطاهر الصفحة
بعد كل المصايب جاي متعنيك
يتأسف لغدره ورايد ينضحه
نجار المثل كال وخالع الباب
ولغيره الابواب الريح التفتحه
غشيم العاف نفسه وضمد جروح
وبجسمه السيوف و نايم بجرحه


************************************

ما منعك بكيفك لوتريد تروح
كلشي تريد اخذ وجروحك اتركهن
ما اكدر انطيهن ذكرياتي وياك
من يوم العرفتك مامفاركهن
كتال الربه واني المربي جروح
... من كبرن وجيت تريد تاخذهن
لذتهن وجعهن وانه تالي الليل 
اتونس عليهن لمن الجمهن


***********************************


تگضي وداعتك وسوالف تصير وبأچر يا وطن يرجع فرحنه
مو عدنه المهم لو متنه ونعيش بس انته المهم كل احنه صحنه
ما ننغش بعد أتعلمنه الدروس صح قاسي الزمن لكن نصحنه
علمنه نعرف الزين والشين يا هو الطيب ويا هو الجرحنه
وما همنه الجرح علمنه الظهور تغفه عالملح علمنه بحنة
وما نغلط بعد ونصير حيطان واحد يكتب وثاني مسحنه
وما نقبل ابد نصبح مراجيح حصتنه التعب صافي ربحنه
وقطعاً يا وطن عايش بالگلوب يعني اگبالنه وين احنه رحنه
ولد الملحه گلي شلون ننساك غزر بينه ياموطن ملحنه
ويامحنه التجي تلگانه الچفوف ذبحنه الميم صارت النه حنّه
وذبحنه المستحيل وكلمة شلون بس حبّك بس هو لذبحنه
ونزرع بالأمل حتىّ يحصدون عدنه اطفالنه باچر فلحنه
ويطلعلك فجر ما اريدك تحير وليلك ينجلي والله بصبحنه
وترجع ياوطن بشلون ما چان وغصبن عالحزن يرجع فرحنه



******************************************



ماريدك بعد...حبك طلع جـــــــــــذاب
كل واحد بدربه...ويلتهي بـــــــــأمره
حافي وياك أمشي...وماكلت تعـــبان
أدوس أعله اللهيب...وتنطفي الجمره
... دللتك طفل..... تتأمر وتخــــــــــتار
ومن تعطش...عيوني تصير ألك جـــره
تذكر من رسمت الضحكه عالشفتين!!!
أنطيتك فرح..!!.تنطيني بس حسره؟؟
تراب تبينت تتنقل أنت هــــــــــــــواي
وبس ريح ليمرك...تنكلب غبـــــــــــره
هاهسه عرفت ليش آنه أريد أنساك..!!!
خايف لاأردلك...وأوكع بحفــــــــــــــره
ماأرجع بعد أعذرني...الله ويـــــــــــــاك
لملم كل غراضك...خلصت الســــفره 


*******************************************

ماكلك نسيتك جذب ماانساك
واذا انساك ابدل كلبي تبديل
عساك انت بسعادة وروح الله وياك
قابل راح اكلك عفية لتشيل

قرارك هذا وانت بكيفك اختار
وبعد ماعندي لدموعك مناديل
عشكتك عشك ادم من عشك حواء
وعفت الجنة لجلك وانت هابيل

كسرت بصدري ضلعي وماكلت اااخ
أخاف احجي وتفز من كلبي وتشيل
وانة اللي اضمك بين الضلوع
عجب من ضلعي تطلع للمخابيل


***********************************************

على الميت جوادر تنصب الناس 
وانه الميت عليك شراح تنصبني 



*********************************************

انه مشتاكلك يالعني صرت بعيد
تعال وداعتك محتاج للملكه
مليت المكابر والشماته هواي
تهلهل كله يمي وعالك الصفكه
جا بيش انه اردهم وانته مامريت
واحس بكلبي صارت ميت الف حركه
ماهزك حنينك بيه ماحسيت
ولاكلبك يكلك طالت الفركه



*********************************************

لازم تنطرد من كلبي وانساك
وامسحك من خيالي وصوره احلامي
واعذب هذا كلبي الضعف وياك
واكطعه من الجذر لو كفر بسلامي
انه اهموم صدك زيدن بيه الجروح
وبحضن نيران حبك عاشت اوهامي
ما اكدر اكرهك مو ضعف انسان
لأن حبك زمان انكتب بيامي
تحط اسهامك انته بكلبي وتروح
وما اكدر اجرحك واضرب اسهامي
كتلك هذا كلبي اخذه مني وروح
ليش انت ارفضت وكتلته كدامي
ما اردلك بعد لو موتصير الكون
لو انت الوحيد اليشفي اللامي
خذت منك نصيبي وجان كله اجروح
وجروحك شككت بحساسي والهامي.



***********************************************


عمت عين اليكول بدونك ارتاح
والف مرة اسبة الكال ناسيك
تتركني؟؟؟؟؟؟؟ احبك وابقة اشتاك
واذا تبعد عمر هم ابقة اتانيك
امل منك!! تصدك هالحجي شلون
واني الليل اكرهة ما حلم بيك 



***********************************************


عساه بذمتك راح اترك النوم
اذا ماريد اشوفك يعني مانام
حسرة علية اغمض جفني لحظات
كبل يم بابكم تاخذني الاحلام
واكلك غيرتك هم تقبل بهاي
عن طبكت جفنهه عيوني صيام
طحت يمك دخيلك راسي مطلوب
بمحكمة الشماتة اتحاكم اعدام
صدك ظميتني بس للاسف وين
على درب الشماتة بقفص من جام
الحمداللة عرفت شبيك مابيك
وميزت الحقائق عن الاوهام
كبل جنت من عوفك ظرف لحظات
كل لحظة التمر تنعد بالف عام
بس وداعتك هسة الوضع غير
تمرني سنين هجرك جنهن ايام


**************************************************

ثواب لفركتك كمت اطبخ جروح
خلي يودي جدره الماشبع ضيم 



************************************************

هيج وصدك صارت شو غفل الوداع
وانه بهجرك اثر بسمارك من اندگ
عگب ماجنت عايش وانه ميت شوگ
وگصتي من الخجل شمنعهة من تعرگ
ويسئلوني عجب تنعزل عن الناس
المفارگ حبيبه تريده مايزهگ
بگد شوغة حسرتي يهز كياني احساس
ميت وادري لكن بالحزن يشهگ
نصيبي من العشگ لتگلي مر عالناس
قناص الجرح والسبع مادنگ
وسبب واگف بقيت شلون تعرف ليش
أنه براسي جرح ملجوم ومعلگ
يروحي انه اخسرت مالومج اتونين
اذا ابجي دمع شيفيدني من أغرگ
وگعت ابير مظلم ماشفت افراح
والواگع ظلم لتقيسه باليزلگ 



**********************************************


يل كتلك أحبك وأنتة ما حســـــــيت ...
شأسويلك بعد يل ماخذ أحساسي ...
مرات أختنك وأتنفسك عبــــــــرات ...
ومرات أختنك وتصير أنفاســــــــي ...



**********************************************


مو كتلي فلا أنساك هيهات
أنه ابعازتك هسه انته وينك!
أمس طاحت دمعتي اكبال شمات
كالوا عاشت ايده البجه عينك



**********************************************



بعيوني شفت الموت والملك اجاني
كتلة ارد اشوف هواي ترخص ثواني 



*************************************************



عندي جروح جدد خلي اراويك
اولهن جرح من شفتك وياه
ويكلك احبك محتفل بيك
ومن يلعب بشعرك مثل الاطفال
وانتة اتكله حاير بيش اجازيك
مو نفس الحجي اللي كلته وياي
وجنت اتبوس ايدي بيوم احاجيك
جنت ابكلبي احسك بس حرامات
هسة بجفي محبس ما اخليك
مو وكت اعتذار اتكلي ندمان
وجاي بكل صلافة اتكلي اراضيك
ارجع للجنت تحسبله نظرات
تـــندل بـــطريقك لو ادليـــك
شيفيد الندم يل ناكر الطيب
تجرحني وتكلي اليوم اداويك
ما أأمن بعد خليني مجروح
جروحي عزاز ثق ما اكدر انطيك



***************************************************



اوديلك اطيوفي يرجعن مدنكات ...
استحن لمن لكنك تحلم بغيري



**************************************************

ﻻتحجيها أعـــــــرف..بينت بيـــك!
سوي اللي تريــده وكلشي مسمـوح
رايح لـــو مسافــــر.. عندك أسباب
حبــك روح بيــه وطلعت الـــــروح
عليك الروح ونت.. كَبل جانت هـاي
هسه الــروح تفـــرح لمـــــن تروح
احسّن بيك واعرف نيتـــك بســـاع
ريحة فركَتـــــك شمتها الجــــروح
الي تذكار تـــارك.. بيك موجـــود؟؟
ماشوفن كَمت.. لــو هوه ممسوح
الوحنــــك جنت لــــو عني أميال
هسه كَبــــالي أنته وانه مالـــــوح
مﻼمــــح روحتـــك شافتها العيون
ويا عطــــر الموادع.. منك يفـــوح
صح كل البكَلبك هسه مستـــــور
بس كَـــدام كَلبي البيــك مفضوح
انه كَلبي تغـــير مثلك هـــــــواي
عاف الحـــزن كله وبطــــل ينـوح
جنت أبالي قلعه وكلهــــا أحــــﻼم
وبيه اخر حلم شفته انه مذبـــوح
مبري الذمـــه روح والله ويـــــاك
بعدك ﻻ تظــن أبقه انه مجــروح
أذا قصدك أتوسل .. انته غلطـــان
ابقه انه الجبل والباقي السفـــوح



**********************************

انتَ بس الهواء!!

كون اكلك انته مو فد شَي خيالي
حتى لو وجهك كُمر ضوه الليالي
حتى لو مثل العنب عنكوده عالي
حتى لو وَحدك ولا غيرك ابالي!!
حتى لو انجن إذا تلغي اتصالي
حتى لو بأسمك أصيح بأنفعالي
حتى لو تتغطه برموشي إودَلالي
حتى لو لَجلك أفوت إولا اُبالي
اخذ مني هالوصف واسمع الصوت
خل أوصفك وانته خليك ابسكوت
انته بس الهواء المن يمي يفوت
عادي لو ما راح أشمك يعني أموت
شفت!!
أصلاً مو خيالي!!



************************************



ضعف من اشوفك وانطي عشر الوان
وتذوب الروح كلش والله كدامك
انه وكلـــشي بيه نحبك ونهواك
ومن راسك نريدك لاخر جدامك
عشك بالروح عايش شاغل التفكير
ومخربط الحال وواضح اجرامــك
الف احساس بيه وانت احلى احساس
وسالفـوة محـــبه وياك جابتني
يا لحظة سكوني وطيشي صافن بيك
صفتني تجيــب بيه والك ودتني
احلى ايام كلبي تمر علي وياك
وعليك الروح ابجي هواي خلتني
لسعة خوف بعدك بيه تاكل حيل
وبس فكرة غيابك حيل تحركني
اريدك يا حبيبي بعيد حبنه الجاي
تبقى ايام شوكي تماشي ايامك ...
اضعف من اشوفك وانطي عشر الوان
وتذوف الروح كلش والله كدامك ..


*******************************************

تدري انه بغيابك من احن شيصير !!
احب حتى الشماته الذكروا اسمك !!


******************************************


نعم ادري ما تصح الي بيــــــــــوم
وادريك ابد ما تنترس عــــــــــــينك
مثل ظلك جنت تعرفني انته بـــهاي
ووصلت فياي بيتك ماصحت ها وينك
ماشايف بشر ينكر فضل محبـــــوب
وانته اول بشر من يامله ديــــــــنك
تنكر عشرتي وتروح ويه الــــــــغير
نمت باحضان ماتعرف بشـــــــــينك
راويتك عشك مامر بالأكـــــــــــوان
وتردني بغدر جا هذا زينـــــــــــــك
طبع بيه الوفه ماله ابد مقـــــــياس
وطبع بيك الجحد معجون وي طيـنك


*******************************************


يجي يوم واشوفك تبجي مثلي دموع
وعلى فراكي اشوفك حـيـل مــقــهور دنيـــا الــبـاع 

بــيــه يــصـيــر مبــيـوع عبـــالــك بــيــه دارت بـيــك مـــــدور

*********************************************

جيتك مستحي وبالكوه ادك البـــــــــاب
وعالخدين سالت دمعه مفضوحـــــــــــه
وصلت الباب دارك واعثرت بالبــــــــــــاب
كد ماتعبتني الجيه والروحــــــــــــــــــــه
بجيت وصحت باسمك من ورى الحيطان
بكلب مكسور يشبه كسرة اللوحــــــــه
حبيبي بداعتي مر عالكلب خطـــــــــــار
وبسجين عينك مزق اجروحـــــــــــــــــه
العالم تذبح الدمعه بضريــــــــــــح ايمام
واني بحضرتك دمعاتي مـــــــــــــذبوحه



******************************************

كاَلوها كَبل الـــــراح ما ينعــــــــــــــــاد
واللحظة الجميلة من الصعب ترجــــــع
عمت عين الوكت ما يدري بينا احبـاب!!
طفت شمعتنا لكن ..ما نست تدمــــع
من يوم الرحت... والكَلب ظل مهجــــور
بيت وغابو أهله .. هم تظن ينفــــــع؟؟
... حسبت انا الخواطر كلمة ترضع شوك
مفطومة الخواطر يــــــا محـــب تطلع!!!
صحت وبصوتـي عبرة ومن صحت يافلان
لكَيتك !!!!....بس لكَيتك صورة ما تسمـع
رحل كلشي بغيابك...بس بقت هالـروح
تروح الروح فدوة ...وبس تعــــــال ارجـع
مكانك بعده فارغ ...ما ملاه الكــــــــــون
كل باب وركن من غيبتك دمّــــــــــــــع


***********************************************


تــوصــل ويــن تــوصــل لاتــطــيــر لــيــفــوكَــ
أبــقــى انــي الأصــيــل وانــت لاحــوكَــي
اذا بــنــيــان الــكــ عــلــيــتــه يــبــن الــنــاس
بــس اثــكَــل لا تــصــفــكَــ هــذا طــابــوكَــي



*********************************************

يــــــامشتاقلك؟! ياحيلي هده الشوكَـ
ومنو الكَال انتهيـــت وكَلبي لجلك طاكَـ؟

وصلت المرحلــــه كَمت احسد الميتين
كَــد مــــــــا كون واسع بيه بعدك ضاكَـ

خلص كلشي بيه الدمــع والحســـرات
بطركَـ صفنه بقيت ويمي كــوم اشواكَـ

هسه انته مشيـــت (أنكَول هم معذور)
النوم اشبي؟البسمه؟ذوله هم عشاكَـ

روحي القـــــاسيه الحملت طعن وجروح
عجيبه شبيهه تزهكَـ من دقيقه افراكَـ


*******************************************


لاتدك بابهم لاياگلبي عيب
تالي الليل خاف انسبب أزعاج
وافرض رجعونه ....وسدو الباب
يگلبي الموت أهون من الأحراج
هضيمه ايطگنه عوز واحنه اهل خير
وعدنه اخوان فوك اجتافهم تاج
عدنه الله يگلبي.... وبعد شنريد
هوه العنده الله شبعد يحتاج


*********************************************

حبيبي يا إنسان يا عاشق ولهان*
لتخليني سهران دمع عيني نيران*
لك مو انته الي ندمان أنى ألي ندمان* 
حسبتك القبطان ثاري طلعت قرصان*
ولك اني احب الفاصوليا وأنتي تحبين الباذنجان*
واني احب ملايين وأنتي تحبين غزلان*
ولج هاي قصتنا ترى ماحلها البرلمان*
ولارئيس الامم المتحدة كوفي عنان*
عوفيني هسه اني راح اتغذى لان اني جوعان*
وبعد ساعة وربع يجي علي حمدان*
تعرفين حمدان.. من ورة الحب لحك صاحبته لليابان*
اعذريني هذا الوكت ابد مابيه أمان*
أخوان هذا الوكت ابد ما صاروا اخوان*
واحدهم بأفغانستان وأخرهم بلبنان*
عذريني مقبط تره باصي اجة مليان*
ابد ما صعدك ابد.. لا.. لا تتوسلين وخري عن البهبهان

واني احول ونظري ضعيف ومريض وتعبان 



******************************************


ماريد الوكت وعلة الوكت زعلان
من يوم الغبت مامرة صالحتة
هيج تريد واحدبالعشك مجنون
من تغيب يزعل حتة وي وكتة
شنو نفع الوكت شوبس هضم وفراك
وبس نار العشك دلالي حاركتة
افكر بيك دوم من الصبح لليل
واجذب لو اكلك ليلي مانمتة
نمت لكن ونيني ايكعد الصوبين
مثل ونت عليل يلوج من علته



*****************************************



عشكتك عشق مو مثل اليحبون
واتســـــــودن اذا مايوم احاجيك
اكول بعيد وانـــــت وسط العيون
وي نبض الكَلــــب جاوين اخليك
تتكبر علي وانـــــــــــــه ممنون
علمني حبيبــــي بيش اراضيك
اذا قيس بزمانــــــه جان مجنون
انه بهل زمان اتســـــودنت بيك



***********************************


مو كلمن يجوع ايمد الچفوف
أكو واحد يجوع اوچفّه مگطوع
أكو كلّش غني بس راسه بالطين
واكو كلّش فقير أو راسه مرفوع
أكو ترضه ابرزقهه اوجايعه اتنام
واكو مثل الذيابه لمّن اتجوع
أشو محّد سمع ونّات الأيتام
مو گالوا ونين الليل مسموع 



***************************************


ولك والله تعبــت كد ما احشم بيك
واوراقي كضــت والقــلم مــــلاني
اكتبلك شعر مـــن الصبح للــــــيل
ولا كلبك يحن وتــجاوب اشجــاني
لو هذه الاحبه اســمه ملك الموت
جاهم حن عليه وبدد احــزانـــــي
بس طبع اليحب يصبر على اليهواه
وانه صابر عليك العمر ومتــانـــــي
بنيراني اشتعل واتــــحمل الاهات
والجويات تـــــسعر وسط وجداني
وانته الماي يمــــي وعينك تشوف
نار توج لضــــاها بأربع اركانــــــــي
تجي وتطفي ناري السرت بالدلال
لو تتركني اذوب ابــــحر هجرانـــي



**************************************


أهواي تأخــــــرت من كلك أتعــــــود....
حلم ترجع بعد لتصــــــــــدك اونلتــــــم
موجـــــان أختيارك وآنه أحاجيــــــــك....
أترك هالغــــــــــــــرور البيك تتنـــــــــدم
ماهمّك كلامي أمعاند أشبــــــــــيك....
نزل دمعي أعله خـدي وانتــــه مامهتم
تدري الخاطرك كلشي آنـــه سويت....
متحّملك جرح وأكــــــــــــبالك أتألـــــــم
آنه الغلطان وأنطـيتك حجــم هيــــج....
وأسولف عن وفائي أتكـــــوم تتبســـم
شفتني أشكد أحــــبك وأستــغليت....
يالجّـــــنك يهـــودي أوياي ماترحــــــــم
أخيّط أجروح كلبي وتنلـــجـــــم حيل....
موحته أعله حالي أبجــي تلك من دم
عرفتك شامت أنته أتصــــــــير وياي....
ماريدك بعد والكعبه مانــــــــــــــــــرهم
لتصدك أحـــــــــــبك والله مانرهــــــم



******************************************


ياصورة فرح سبحان من سواك
وياعطر الورد هنيال من شمك!!
ناسي الدنيه كلهه وماگدرت انساك
لان هذا العمر مايسوه من بعدك

يالوحه وقصيده وشاعر ورسام
كل حبر القلم مايگدر يوصفك
ياتفاحة ادم وبيك انه نغريت
يالكلك ترافه منين مالزمك
شلون تريد انسى وبيه صاير روحي 
العايف همومي وملتهي بهمك
يالون الربيع وسهر الولايات
يالدمي احسه انخبط وي دمك

لارايد تحبني ولاتريد انساك
ولارايد تجيني ولا اجي يمك
ولا انته هجرتني ولا بقيت وياي
ولاتقبل اعيش ايامي من بعدك
اذن حل القضيه واحد من ثنين
لوكلك تجيني لو تجي كلك



*******************************************

أنا ترجيتك بعــــــد من بابي لتفوت
لان من كثر نـــــــورك انعمت عيني
وبلايا الشــــوك صدَك لا تظن مرتاح
يل بشوكـــــكَ صدَك تُعَمر اسنيني
يا نسمة هوه شمــــحلآك لو مريت
واذا انت كــــــــطعت ياهو اليروييني
تمنيتك طيـــــف انت وبالحلم الكاك
بس انت حقـــــــــــيقه وما توافيني
وافيني بشــوفــتك وعني ابد لتغيب
بشفافك المآي بـعدك منهو ينطيني
وعليك اهـــــــــمل والله حته العيون
وحتة الدمــــــع بعدك ما يواسيني



**************************************



احس متغير اني ومـــــــالي خلك الناس
وأحس تعبان كلبي من الوكت مــــــقهور
مثل غيمة حزن تمـــــطر علي كبـــــريت
وانه بنار عايش والدمـــــوع تــفــــــــــــور
كل يوم الامس مثل الفلــــــم ينعــــــــاد
وباجر والامس والجاي نفـــــــس الطــــور
ناعور الوكت يســـــــگيني جان اشـــعار
وافتر الوكت وانه الــــــصرت ناعـــــــــــــور
جنت اضحك واسولـــــــــف ويا هذا وذاك
على غفلة ولگيت الناس كلها جــــــــور
طرت بجـــــــــناح واحد للفرح فد يـــــــوم
شو حتـــــــى الفرح ردني بجنح مكسور
ضيعت البـــــــــخت وانه الجنت محـــظوظ
حتى ويا العــــــشك ما عشت لحضة بنور
يا كلبي شكثر عذبــــــــــــتك انت ويــــــاي
احس كلبي على كلبي من الحزن مفطور
احس كلبي على كلبي من الحزن مفطور



****************************************

مليت الصبر والصبر ملاني
خلصت العمر بالضيم والحسرات
واكابر وابتسم لو شفت عدوان
خاويت الحزن لجلك وكلت التهون
شوصفك والوصف محتار خلاني
غلطان بمحبتك غلطه الشطار
مو طلعت بالف عمري الثمن اني
طبع بيك الخيانه والغدر معروف
وفه واخلاص دك وياك ميزاني
بعد ما اريدك انه قررت انساك
انسه الماضي كله وانسه عنواني
ما اعتب بعد روح الله وياك
شمتاني تكلي شرايد متاني



************************************



عمت عينه الينام وأنت عنه أبعيد
ياشاغل خيالي وبيك صفناتي
دخيلك لاتروح أرجوك ظل وياي
بكثر دجلة وفرات عليك دمعاتي
الصور ماتكفي ارد اشوفك راح اموت
عيني يوميه اعلى مودك ساهيه
حتى من ناسي القريبين انعفيت
وماعشت لحظه اعلى مودك راهيه
ملح سالفتي واغزر باليموت
شبيهه بس وياك صارت فاهيه

طعم اللوز صدك مو طعمها
ربك بالمحاسن مو طعمها
اذا بسكت ابوهة وموطا عمها
وامهه النستلة شتصير هيه



**********************************

كون ارجع طفل والعب مراجيح .
واتمنى الحزن انساه وينساني
ولو صاير طبع من صار الفراك
يا يوسف صرت يعقوب الك اني
اتمنى طفل وانسه الجرالي وياك
وافرح بالفرح ويصيـــــــر عنواني
كونك ما شفتني ولا عرفتك يوم
ولا صرت انت ديني وصرت قرآني
مرة اتمنى موت ومره ارد للشوك
مو هيج العشك ينزف بشرياني
ودكات الكلب دكات مهضومات
جا يمته الفرج يدخل بزنزاني؟؟
اسير انه بمحبتك يالعذابك كيف
مو تدري بعذابك جرم بأنساني
موتدري بلهفتك لهفه الغركان؟؟
بس كونك تجيني وعدل تلكاني
مثل حر الرمل تاركني بالصحراء
كون الموت بالصحراء يلفاني
لان عايش غريب بوسط كل الناس
بس انت الكلت مايوم تنساني
تمنيتك تجيني بجية العيد

تشوف اشلون عيدي يمرجح احزاني
تشوف اشلون عيدي يمرجح احزاني



****************************************



اجه واحـد علية وگـالي شبيـــــــــك
احس حملك ثگيل ودمعة بعيــــونك
و احس داخل گليبك نار تشعل نـــار
و احس ظهرك حنيتة وهدلن متـونك
گتلة القصة هيج وهيج بية الصـــــار
صـــــاح الله واكبر عمي خيـــــعونك
مايسوون اظفرك خلهم يـــــــــولون
ماعدهم گلب ذولة اليخـــــــــونونك
تتعذب عليمن انتة هـم انـــــــسـان
بس دوس اعلة گلبك لا يـــدوسونك
وعليمن تنتظرهم ( والله ميرجعون )
حيــــل بعيد صارو ما يـــــــــذكرونك
و لو بيهم أمل انتظر چـــــــــان وياك
بس قاسي گلبهم ما يفيــــــــدونك
و اخذ مني نصيحة وعوف دمع العين
صافن لا تظل باجر يعبـــــــــــــرونك 



*************************************

حاجيته وكلتله هوايه الك مشتاك
كال هوايه تحلم ..سده موضوعك
كتله شبيك ضايج مني اذا مرتـاح
كال ارتاح لمن تنزل........دموعـك
مو صوجك ولك صوج الكلب حبـاك
... ... انسى ولاتظني استقبل رجوعـك
تريد تشوف وجهي مدمع وخجلان
وك والله الا اخلي النار....بضلوعـك
فرحان انا هسه ومن عرفتك زيــن
راح انساك راح اطفيلك شموعــك
ماتنزل دمعتي بس على الغاليــن
والغالين عندي مو مثل..... نوعك



****************************************


مامحتاج منك بعد مدت ايد
وكفت الوحدي وما اريد تجايه
سد بابك عليك وما اريد امرن بيك
كلمن مشه برايه ومبحر برايه
عرفتك ما تميز الزين من الشين
ولا مره وكفت الصاحبك رايه
تصح وادم وجه وتصح بشر وجهين
بس انته الوحيد الشايل اهوايه
مو كتلي البحر نصين انه وياك
نتقاسم نجيبه ونشرب ابمايه
شو مرني العطش ما شفت جفك كام
ولا شفتك وفيت بهاي الحجايه
عشت ورده تكول اطباعي يم الناس
جربتك لكيتك انته سلايه



*************************************



عشنه على الأمل والقال والقيل
وكتبنه من الصبر كومة مواويل                                                  
وفتحنه اكلوبنه للرايح وللجاي
نضحك من غصب ودموعنه اتسيل
توسدنه الحزن بفراش الهموم
وكح طبع الوكت بجروحنه ايعيل
تعودنه عله كلمة (باجر تهون)
وكضينه اعمارنه ابعز وتواصيل
راضين ابخبزنه انغمس أدموع
وأذا رايد بعد من دارنه انشيل
انطيعك ياوكت بس كول شتريد
لأن عندك عقل واحنه ألمخابيل


*****************************************

ليست هناك تعليقات:

كود تعليقات الفيسبوك مأخوذة من mybloggertricks.com تم تركيب تعليقات الفيسبوك من konozblog.blogspot.com

إرسال تعليق